Ədliyyə Akademiyasında, Şuşa şəhərinin, Qarabağ otelində Gürcüstan Mediatorlar Assosiasiyası sədrinin kitabının təqdimatı olub.
Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyi tərəfindən maliyyələşdirilən Avrasiya Hüquqşünaslar Assosiasiyasının “Mediasiya (mübahisələrin səmərəli həlli vasitəsi) — Praktik dəsrlik” kitabı nəşr edilib. Nəşr olunan kitab Mediasiya Şurasının metodiki dəstəyi və rəyi əsasında çap olunub.
İlk dəfə Azərbaycan dilində nəşr edilən tədris vəsaiti mediatorların praktik biliklərinin artırılmasında, professional səviyyələrinin yüksəldilməsində mühüm rol oynayacaq.
Kitabın nəşrinin əsas məqsədi mediasiya sahəsində praktiki bacarıqların artırılmasına dəstək olmaq, mediasiya proseslərinin effektivliyində, keyfiyyətli mediasiya xidmətlərinin göstərilməsi sahəsində mediatorluğa namizədlərin və mediatorların bilik və bacarığının artırılmasıdır. Kitabda mediasiya prosesinin müxtəlif mərhələləri, metodları və strategiyaları ətraflı şəkildə izah olunur. Eyni zamanda, kitabda mediasiya sahəsində beynəlxalq təcrübələr və tövsiyələr də yer alır.
Ədliyyə Akademiyasında keçirilən təqdimat mərasimində Mediasiya Şurası İdarə Heyətinin sədri Nadir Adilov, Qeyri-Hökumət Təşkilatlarına Dövlət Dəstəyi Agentliyinin Layihələrin idarəedilməsi üzrə meneceri Mehti Mehtiyev və AR Ədliyyə Nazirliyinin Ədliyyə Akademiyasının prorektoru Elçin Xələfov çıxış edib. Tədbirdə həmçinin mediasiya təşkilatı rəhbərləri və mediatorlar iştirak edib.
Kitab barədə danışan Mediasiya Şurası İdarə Heyətinin sədri Nadir Adilov ilk olaraq kitabın müəllifi, Gürcüstan Mediatorlar Assosiasiyası İdarə Heyətinin sədri İrakli Kandaşviliyə təşəkkürlərini bildirib. O qeyd edib ki, İrakli Kandaşvili dost və qardaş gürcü xalqınının simasında Azərbaycanı sevən şəxslərdəndir və dostumuzdur. O qeyd edib ki, İrakli Kandaşvilinin kitabının Azərbaycan dilində nəşr olunması təkcə mediasiya sahəsində biliklərin öyrənilməsində deyil, həmçinin iki xalq və xalqların peşə birlikləri arasında olan dostluq və qardaşlığın nümunəsidir. O, mediatorlara kitabı oxumağı və İrakli Kandaşvilinin Azərbaycana səfəri zamanı kitabın onunla müzakirəsinin təşkil edilməsini tövsiyə edib.
Təqdimat mərasimi kitab barədə fikirlərin bildirilməsi ilə başa çatıb. Kitablar mediatorlara ödənişsiz olaraq təqdim edilib.
Məlumat üçün qeyd edək ki, «GreenPen.az» ictimaiyyətlə əlaqələr (PR) resursu ilə informasiya və təlim sahəsində əməkdaşlığı inkişaf edən Qusar rayon 1 saylı Mediasiya Təşkilatının rəhbəri Radik Kazımovdan aldığımız məlumata görə bölgələrdən olan mediatorların Ədliyyə Akademiyasında Mediasiya Şurasının İdarə Heyətinin sədri, hüquq üzrə fəlsəfə doktoru, dosent Nadir Adilovun müəllifliyi ilə nəşr edilən “Mediasiya xidmətlərində marketinq işinin təşkili” adlı praktiki vəsaitin 1-ci hissəsinin təqdimatında və Şuşa şəhərində, Qarabağ otelində keçirilmiş Gürcüstan Mediatorlar Assosiasiyası İdarə Heyətinin sədri İrakli Kandaşvilinin müəllifi olduğu “Mediasiya (mübahisələrin səmərəli həlli vasitəsi) — Praktik dərslik” kitabının təqdimatında iştirak komanda üzvlərimiz üçün çox maraqlı və faydalı idi.
Ümid edirik ki, bu yeni nəşrlər və təlim vəsaitləri Mediasiya təşkilatların kadr potensialının və resurs-metodik bazasının gücləndirilməsində müsbət rol olnayacaq.
